SIVURUGWI KIRAHISI

Pigeni kwenzi kinyago, mjiumize vidole,

Geuzieni visogo, ili nisiende mbele,

Mnajipa tu mizigo, mambo yangu palepale,

Acheni kujisumbua, sivurugwi kirahisi.

Mnatunisha misuli, kunitishia mwenzenu,

Mwanishuparia kweli, hamjali ndugu yenu,

Mnaninyang`anya mali, mnataka ziwe zenu,

Mnakazana kwa nguvu, mpate kunivuruga.

Mkiniona mnyonge, si kwamba nimedhoofu,

Natulia nijipange, nisijedondoka bufu!

Sio nacheza madange, mnione mpumbafu,

Sivurugwi kirahisi, maana niko ngangali.

Sawa maisha magumu, watu tunajikokota,

Sithubutu kunywa sumu, roho yangu ikakata,

Kwani  Mungu mkarimu, nikiomba nitapata,

Maadui sawa wapo, hata hivyo sivurugwi.

Ahsante adui zangu, mnanipa ujasiri,

Hongera rafiki zangu, mwanifanya mashuhuri,

Mnaponipiga rungu, nazidi kuwa mahiri,

Sivurugwi kirahisi, ipo kazi kunizima.

Chura akipigwa teke, afurahi kwelikweli,

Maana ni faida kwake, inapungua safari,

Nikipigwa nivunjike, ndio naota misuli,

Sivurugwi kirahisi, acheni kujisumbua.

Haya maisha ya sasa, ni magumu kwelikweli,

Kama mtu huna pesa, yatakupiga kabali,

Tena yatakutikisa, uchungulie kabuli,

Ndo mana siwi mvivu, nisije nikavurugwa.

Kwanza watu wana wivu, wanaweza kukuua,

Wale walo na mabavu, waweza kukusumbua,

Dunia tambala bovu, acha kutuongopea,

Watu ndo walowabovu, wanavurugana ovyo.