PENZI FARAJA YA MOYO

Uipatapo furaha, na siku uhesabika,

Kuziepuka karaha, machungu yakikufika,

Penzi kitovu cha raha, ulipate lojengeka,

Ooh! Mola jaalia, tamu penzi barikia

Furaha yangu moyoni, kingine wapi tapata,

Chema changu ki  rohoni, shika nimekikamata,

Niliomba katamani, furaha  moyo kupata,

Oh!  Mola jaalia, tamu penzi barikia.

Penzi ni tamu jamani, shamirio  kama ua,

Hasilani sitamani, mwenye sifa kusumbua,

Uwepo wako imani, pepo ndogo tunu ua,

Oh! Mola jaalia, tamu penzi barikia.

Uaminifu  kijenzi, kwa hilo nampa sifa,

Penzi  lake  la kitenzi, hai haliwezi kufa,

Nina limiliki penzi, lisilo na namba shufa,

Oh! Mola jaalia, tamu penzi barikia

Upendo wake amani, roho mie wako mwili,

Sifa zote za thamani, pendo lazidi akili,

Nina kupenda yakini, mimi si mshika mbili,

Ooh! Mola jaalia, tamu penzi barikia

Nakuhifadhi moyoni, nakukumbuka ndotoni,

Tuwepo faraghani, na vineno vya utani,

Sito baki taabuni, tupendane maishani

Oh! Mola jaalia, tamu penzi barikia