RANGI NYEUPE

Naanza kwa kuuliza, swali langu ubetini

Msije mkanizoza, swali kuweka rehani

Nazipunguza bughuza,  lugha iliyo laini

  Nyeupe ni rangi gani,washairi nijibuni

Rangi nyeupe ni ipi,  naomba nielezeni

Msinipe jibu fupi,  kuishia sikioni

Hilo litakuwa kapi, vundo kubwa  la moyoni

  Nyeupe ni rangi gani,washairi nijibuni

Nyeupe na mwanga  kipi, tofautize nipeni

Tofauti zake zipi, nipeni jibu makini

Rangi ya maji ni ipi, wasomi nielezeni

  Nyeupe ni rangi gani,washairi nijibuni

Mavazi yangu meupe, hayafanani na sanda

Nava mchana kweupe, hata giza likitanda

Sina ubishi wa kupe, na nguvu zangu za panda

  Nyeupe ni rangi gani,washairi nijibuni

Mwenye kupenda nimpe, weupe si jasho  punda

Naukataa weupe,  umenitia madonda

Si ng`ang`ani  kama kupe, nisije kuvikwa sanda

  Nyeupe ni rangi gani,washairi nijibuni

Usisumbukie rangi, ipendezayo machoni

Na yame wafika wengi, nawahifadhi moyoni

Ni hii nyeupe rangi, imeniweka tatani

  Nyeupe ni rangi gani,washairi nijibuni

Na yatakufika mengi, kipenda rangi gizani

Meziona rangi nyingi, nyeupe siitamani

Naiwekea vigingi, kwa vina pia mizani

  Nyeupe ni rangi gani,washairi nijibuni

Niliipenda zamani, ikanipa maridadi

Kikatiza mitaani, vidole sivyo idadi

Rangi nyingi zifitini, kwa joto na ubaridi

  Nyeupe ni rangi gani,washairi nijibuni

Mbeya wa kule kusini, na mzee wa ujima

Una busara yakini, nipatie jibu wima

Wakili we ni makini, nijibu toka Dodoma

   Nyeupe ni rangi gani,washairi nijibuni