CHOZI LAKO

Naitafakari siku, ilivyoishia vema

Tena Kwa nyingi shauku, nilitamani kusema

Na hali yangu kapuku, akili ikazizima

Asante kwa chozi lako, nimeijua  thamani

Anililiaye nani, kwa uchungu wa mapendo

Nalijihisi katuni, tena nisiye vishindo

Nitesekae jangwani, nisipate maji fundo

Asante kwa chozi lako, nimeijua  thamani

Kutangatanga msafiri, nisietua mizigo

Ninazipanga safari, zilizo nyingi mitego

Sasa natafakari, ingawa mekupa zogo

Asante kwa chozi lako, nimeijua  thamani

Neno gani nikwambie, huenda ukaelewa

Unisikilize mie, tayari nimechachawa

Ububu nijivikie, usije ona melewa

Asante kwa chozi lako, nimeijua  thamani

Nalikutoa machozi, na wala sikukufuta

Yalidondoka kwe ngozi, hukutaka kupukuta

Nilijifanya ajizi, nisiyejua chakufata

Asante kwa chozi lako, nimeijua  thamani

Asante kwa chozi lako, limeniweka furahani

Najua thamani yako, sitokutoa moyoni

Sikuliliwa mwenzako, wewe wa kwanza amini

Asante kwa chozi lako, nimeijua  thamani

Ujuaye hali yangu, na bado ukathamini

Nakuapia kwa Mungu, sitaitema amini

Sitayasikia majungu, wakitema midomoni

Asante kwa chozi lako, nimeijua  thamani

Sijui nawaza nini, kujibu yaso kichwani

Nashukuru ukibaini, niyasemayo betini

Ndiyo yaliyo moyoni, tena hayo ya sirini

Asante kwa chozi lako, nimeijua  thamani

Huruma  pendo la kweli, hujifichama moyoni

Huna jicho la tapeli, kujisafi tu usoni

Huzuni yako ya kweli, naitazama machoni

Asante kwa chozi lako, nimeijua  thamani

By Fulgence Makayula